Komdu út og á fjöll

Komdu út og á fjöll - vor 2022

Skráning á biðlista

Upp til fjalla bíða okkar ævintýri og upplifun af ýmsum toga. Ferðafélag Akureyrar verður með skipulagða hópa í fjallgöngum í sumar. Ef þú ert að leita að útivist þar sem gengið er á fjöll og farið á áhugaverða staði á Norðurlandi þá er þetta hópurinn fyrir þig. Farið verður í átta ferðir á tímabilinu 10. maí - 26. júní 2022. Helmingur ferðanna er á virkum dögum (seinni part) og hinn helmingurinn um helgar.
Nánari upplýsingar um fyrirhugaða dagskrá.

Gönguhópurinn „Komdu út og á fjöll“ hjá FFA er fyrir alla sem eru í þokkalegu gönguformi og miðast erfiðleikastig og gönguhraði ferða við tvo til þrjá skó. Haft verður að leiðarljósi að „njóta en ekki þjóta“. Byrjað verður á lægri fjöllum til að auka þol þátttakenda. Um er að ræða gönguhóp sem haldið verður vel utan um m.a. með öruggri fararstjórn reyndra fararstjóra, facebókarsíðu og góðri upplýsingagjöf.

Ferðirnar verða á þriðjudögum og fimmtudögum kl. 18:00 og laugardögum eða sunnudögum kl. 09:00.

Gert er ráð fyrir að ferðir sem farnar verða um helgar verði 5 - 7 tímar með akstri, en á virkum dögum eru ferðirnar styttri, eða 3 - 4 tímar með akstri. Þátttakendur koma á eigin bílum og er upphafsstaður ferða við Ferðafélag Akureyrar, Strandgötu 23.

Umsjón með verkefninu hafa Anna Sigrún Rafnsdóttir og Kristján Hreinsson og eru þau jafnframt fararstjórar í ferðunum. Hugsanlega bætast einhverjir fararstjórar við í ákveðnum ferðum. 
Fyrirspurnum er hægt að beina til Önnu Sigrúnar á netfangið annasr45@gmail.com eða í síma 848 1090. Fyrirspurnir má einnig senda á netfangið formadur@ffa.is.

Skráningu lýkur 3. maí og verkefnið hefst 10. maí. Skráningarhnappur er hér á síðunni.

Lágmarksfjöldi er 12 þátttakendur.

Verð: 24.500 kr. fyrir félaga í FFA eða FÍ, sama verð fyrir maka. Fyrir aðra bætist félagsgjald FFA við sem er 8.900 kr. Greiða þarf námskeiðið þegar skráningu lýkur; krafa verður stofnuð í netbanka.

ATH. Með félagsskírteini FFA fæst afsláttur í mörgum sportvöruverslunum s.s. Skíðaþjónustunni og Útivist og sport. Sjá nánar á Gerast félagi í FFA, þar er hægt að skrá sig í félagið.

Þátttakendur ferðast á eigin ábyrgð. FFA tryggir hvorki farþega sína né farangur þeirra og hvetur fólk til að kynna sér eigin heimilistryggingar eða kaupa ferða- og slysatryggingu.