Lambi – vetrarferðir

Á veturna er gönguleiðin fram Glerárdal í Lamba (11 km) oft mjög snjóþung og seinfarin. Gangandi fólk verður þá annað hvort að vera á skíðum eða snjóþrúgum. Ef er snjólítið eða hjarnfæri, þarf að hafa brodda meðferðis undir skóna.

Best er að fylgja stikuðu leiðinni frá bílastæðinu við Heimari-Hlífá inn bakka Glerár og síðan upp í hlíðina og að brúnni á Fremri-Lambá (GPS: 65°36’03,61”N – 18°15’05,05”V). Erfitt getur verið að komast yfir gil Fremri-Lambár að vetri. Þar eru oft snjóhengjur, einkum norðan megin í gilinu. Frá Fremri-Lambá eru um 3 km eftir stikuðu leiðinni fram í skálann (GPS: 65°34’52,04”N – 18°17’44,69”V).

Að vetri er yfirleitt ekkert vatn að hafa við skálann. Þá þarf að bræða snjó til drykkjar. Þegar skálinn er yfirgefinn, er mikilvægt að slökkva öll ljós og loka tvöföldu útidyrunum vandlega, skv. leiðbeiningum á hurðunum.

Athugið að veður getur verið mjög slæmt frammi á Glerárdal þótt sæmilegt veður sé niðri í byggð. Ef ganga skal fram í Lamba í skammdeginu, er mikilvægt að leggja af stað snemma dags, því mjög erfitt getur verið að finna skálann eftir að myrkur er dottið á.

Góða ferð,

Ferðafélag Akureyrar